ദോഹ: ഖത്തറിലെ അമേരിക്കൻ വ്യോമതാവളത്തിന് നേരെ ഇറാൻ തിങ്കളാഴ്ച വൈകുന്നേരം ശക്തമായ മിസൈൽ ആക്രമണം നടത്തി.

ഖത്തറിന്റെ വ്യോമ പ്രതിരോധ സംവിധാനങ്ങൾ ആക്രമണം വിജയകരമായി പരാജയപ്പെടുത്തുകയും ഇറാനിയൻ മിസൈലുകൾ തകർക്കുകയും ചെയ്തുവെന്നും ആളപായമൊന്നും ഉണ്ടായിട്ടില്ലെന്നും ഖത്തർ വിദേശകാര്യ വക്താവ് മജീദ് അൽ അൻസാരി പ്രസ്താവനയിൽ പറഞ്ഞു.

രാജ്യത്തെ സുരക്ഷാ സ്ഥിതി സുസ്ഥിരമായി തുടരുന്നുവെന്നും ആശങ്കപ്പെടേണ്ട സാഹചര്യമില്ലെന്നും ഖത്തർ ആഭ്യന്തര മന്ത്രാലയം അറിയിച്ചു.

ഇസ്രായേലും ഇറാനും തമ്മിലുള്ള സംഘർഷത്തിനിടയിൽ അൽ ഉദൈദ് താവളത്തിൽ നിന്ന് യുഎസ് സൈന്യം ചില വിമാനങ്ങൾ മാറ്റിയിരുന്നുവെന്ന് രണ്ട് പ്രതിരോധ ഉദ്യോഗസ്ഥർ അമേരിക്കൻ മാധ്യമങ്ങളോട് പറഞ്ഞു. ജൂൺ 19 ന് എടുത്ത അൽ ഉദൈദ് വ്യോമതാവളത്തിന്റെ ഉപഗ്രഹ ചിത്രത്തിൽ ഏതാണ്ട് ശൂന്യമായ ടാർമാക്കുകൾ കാണിക്കുന്നുണ്ടെന്ന് സിഎൻഎൻ റിപ്പോർട്ട് ചെയ്തു.

അൽ ഉദൈദ് വ്യോമതാവളത്തിനെതിരെ തൊടുത്തുവിട്ട മിസൈലുകളുടെ എണ്ണം ഇറാനിയൻ ആണവ കേന്ദ്രങ്ങളിൽ അമേരിക്ക വർഷിച്ച ബോംബുകളുടെ എണ്ണത്തിന് തുല്യമാണെന്ന് ഇറാൻ പറഞ്ഞു.

ജനസാന്ദ്രതയുള്ള പ്രദേശങ്ങൾക്ക് പുറത്തായതിനാലാണ് അമേരിക്കൻ താവളം ലക്ഷ്യമിട്ടതെന്നും ഇറാൻ പറഞ്ഞു.

ജനങ്ങൾക്ക് പരിക്കേൽക്കുന്നത് ഒഴിവാക്കാൻ ഇറാനിയൻ അധികൃതർ ഖത്തർ അധികൃതരുമായി ആക്രമണം ഏകോപിപ്പിച്ചതായും റിപ്പോർട്ടുകൾ പറയുന്നു. ആക്രമണങ്ങൾ പ്രതീക്ഷിച്ച് ഖത്തറിലെയും മേഖലയിലെയും അമേരിക്കൻ വ്യോമതാവളങ്ങൾ പൂർണ്ണമായും ഒഴിപ്പിച്ചിരുന്നു.

ഖത്തറിന്റെ ആകാശത്തിന് മുകളിലൂടെ അൽ ഉദൈദ് താവളത്തിലേക്ക് മിസൈലുകൾ പറക്കുന്നതിന്റെ വീഡിയോകൾ സോഷ്യൽ മീഡിയയിൽ നിറഞ്ഞു. വലിയ സ്ഫോടന ശബ്ദം കേട്ട് ആളുകൾ വീടുകളിൽ നിന്ന് പുറത്തേക്ക് വന്നു, പലരും മിസൈലുകൾ പറക്കുന്നതിന്റെ വീഡിയോകൾ പകർത്തി സോഷ്യൽ മീഡിയയിൽ പങ്കിട്ടു.

സ്ഫോടന ശബ്ദം കേട്ട് ആളുകൾ പരിഭ്രാന്തരായി മാളിൽ നിന്ന് ഓടുന്നത് ഒരു വീഡിയോയിൽ കാണാം.

ഇറാൻ നടത്തിയ മിസൈൽ ആക്രമണത്തിന് മുന്നോടിയായി ഖത്തർ വ്യോമാതിർത്തി അടച്ചു.

ഇസ്രായേലിനെതിരെ ഉപയോഗിക്കുന്ന അതിശക്തമായ മിസൈലുകളെ അപേക്ഷിച്ച് ഈ ആക്രമണത്തിൽ ഇറാൻ ഹ്രസ്വ, ഇടത്തരം മിസൈലുകളാണ് ഉപയോഗിച്ചത്.

അതേസമയം മിസൈലിന്റെ അവശിഷ്ടങ്ങൾ തുറന്ന് സ്ഥലത്തു പതിച്ചതായും റിപ്പോർട്ടുകളുണ്ട്. ഖത്തറിലേക്കുള്ള യാത്രാമധ്യേ ലെബനൻ പ്രധാനമന്ത്രി നവാഫ് സലാമിന്റെ വിമാനം ബഹ്‌റൈനിൽ ഇറങ്ങി.

ഗൾഫിൽ നിന്നുള്ള വിമാനങ്ങൾ തിരിച്ചുവിടുന്നതിനാൽ, ഗൾഫിലുടനീളമുള്ള വിമാനത്താവളങ്ങളിൽ വിമാനങ്ങൾ റദ്ദാക്കുകയോ വൈകുകയോ വഴിതിരിച്ചുവിടുകയോ ചെയ്യുന്നുണ്ട്.

ഖത്തറിനെതിരായ ആക്രമണങ്ങളെ എല്ലാ ഗൾഫ് രാജ്യങ്ങളും അപലപിച്ചു.