ദോഹ: ഒരൊറ്റ വിസയിൽ എല്ലാ ഗൾഫ് രാജ്യങ്ങളും സന്ദർശിക്കാൻ അനുവദിക്കുന്ന ഷെങ്കൻ ശൈലിയിലുള്ള ജി സി സ് സിംഗിൾ ടൂറിസ്റ്റ് വിസ ഔദ്യോഗികമായി ഗൾഫ് രാജ്യങ്ങൾ അംഗീകരിച്ചതായും ഉടൻ തന്നെ ഇത് പുറത്തിറക്കുമെന്നും യുഎഇ മന്ത്രി അറിയിച്ചു.

യുഎഇ ഹോസ്പിറ്റാലിറ്റി സമ്മർ ക്യാമ്പ് പത്രസമ്മേളനത്തിനിടെ ഖലീജ് ടൈംസിനോട് യുഎഇ സാമ്പത്തിക മന്ത്രി അബ്ദുള്ള ബിൻ തൗഖ് അൽ-മർറിയാണ് ഇക്കാര്യം പറഞ്ഞത്.

"സിംഗിൾ (ജിസിസി) ടൂറിസ്റ്റ് വിസ അംഗീകരിച്ചു, ഇപ്പോൾ നടപ്പാക്കാൻ കാത്തിരിക്കുകയാണ്, ഉടൻ പ്രതീക്ഷിക്കാം," അദ്ദേഹം പറഞ്ഞു.

ഖത്തർ, സൗദി അറേബ്യ, ഒമാൻ, കുവൈറ്റ്, യുഎഇ, ബഹ്‌റൈൻ എന്നീ ആറ് ജിസിസി രാജ്യങ്ങളിലുടനീളം തടസ്സമില്ലാത്ത യാത്ര സാധ്യമാക്കുന്ന തരത്തിൽ, പ്രാദേശിക ടൂറിസത്തിന് നിർണായക നാഴികക്കല്ലായി ഈ തന്ത്രപരമായ നീക്കം കണക്കാക്കപ്പെടുന്നു.

നടപ്പാക്കിക്കഴിഞ്ഞാൽ, ആറ് ജിസിസി രാജ്യങ്ങളിലേക്കും പ്രവേശനം സാധ്യമാക്കാനും വിനോദസഞ്ചാരികൾക്ക് പേപ്പർ ജോലികൾ ലളിതമാക്കാനും ജിസിസിയിലുടനീളമുള്ള താമസക്കാർക്ക് എളുപ്പത്തിലുള്ള യാത്ര സാധ്യമാക്കാനും വിസ സഹായിക്കും.