ദോഹ: മുംബൈയിലെ സ്വന്തം വസതിയിൽ കുത്തേറ്റ സംഭവത്തിന് മാസങ്ങൾക്ക് ശേഷം, ബോളിവുഡ് നടനും ചലച്ചിത്ര നിർമ്മാതാവുമായ സെയ്ഫ് അലി ഖാൻ ദോഹയിൽ റെസിഡൻഷ്യൽ പ്രോപ്പർട്ടി വാങ്ങി.

പേൾ ഖത്തറിലെ സെന്റ് റെജിസ് മാർസ അറേബ്യ ഐലൻഡിലാണ് സെയ്ഫ് അലി ഖാൻ പ്രോപ്പർട്ടി വാങ്ങിയത്. അൽഫർദാൻ ഗ്രൂപ്പ് മുംബൈയിൽ നടത്തിയ പത്രസമ്മേളനത്തിലാണ് ഇക്കാര്യം അറിയിച്ചത്.

ദോഹയിൽ ഒരു പ്രോപ്പർട്ടി വാങ്ങാനുള്ള തീരുമാനത്തിന് പ്രധാന കാരണം ഖത്തറിലെ സുരക്ഷയാണെന്ന് അദ്ദേഹം പറഞ്ഞു.

"ലോകത്തിന്റെ പല ഭാഗങ്ങളും ഞാൻ സന്ദർശിച്ചിട്ടുണ്ട്, പക്ഷേ ഖത്തർ യഥാർത്ഥത്തിൽ സവിശേഷമായ ചിലത് വാഗ്ദാനം ചെയ്യുന്നു - സമാധാനം, സുരക്ഷ, ആധുനിക ജീവിതം. ഇന്ത്യയുമായുള്ള സാമീപ്യം ഖത്തറിനെ എനിക്കും എന്റെ കുടുംബത്തിനും അനുയോജ്യമായ സ്ഥലമാക്കി മാറ്റുന്നു,” പത്രസമ്മേളനത്തിൽ സെയ്ഫ് അലി ഖാൻ പറഞ്ഞു.

"ഒരു ദ്വീപിനുള്ളിലെ ഒരു ദ്വീപ് എന്ന സങ്കൽപ്പവും വളരെ ആഡംബരപൂർണ്ണവും മനോഹരവുമാണ്, മാത്രമല്ല ഇത് ജീവിക്കാൻ വളരെ മനോഹരമായ ഒരു സ്ഥലം കൂടിയാണ്." ദോഹയിലെ ഒരു ഷൂട്ടിംഗിനിടെ തൻ്റെ പുതിയ വസതിയിൽ താമസിച്ചതിനെക്കുറിച്ചും അദ്ദേഹം പരാമർശിച്ചു.

മൂന്ന് മാസം മുമ്പ്, സെയ്ഫ് അലി ഖാനെ ബാന്ദ്രയിലെ അപ്പാർട്ട്മെന്റിൽ വെച്ച് ഒരു അജ്ഞാതൻ ആക്രമിചിരുന്നു. ഗുരുതരമായി പരിക്കേറ്റ ഖാൻ സുഖം പ്രാപിച്ചതിന് ശേഷം വീണ്ടും സിനിമ മേഖലയിൽ സജീവമാണ്.