ദോഹ: ഖത്തറിൽ വിവിധ ഒഴിവുകളിലേക്കായി 5,000 കെനിയൻ പൗരന്മാരെ റിക്രൂട്ട് ചെയ്യാൻ കെനിയൻ ഗവണ്മെന്റ് നടപടികൾ ആരംഭിച്ചതായി കെനിയൻ മാധ്യമങ്ങൾ റിപ്പോർട്ട് ചെയ്തു.

നവംബർ 20-ന് റിക്രൂട്ട്‌മെൻ്റ് ആരംഭിക്കുമെന്നും രാജ്യത്തെ 47 മേഖലകളിലും ഇത് നടക്കുമെന്നും ലേബർ ആൻഡ് സോഷ്യൽ പ്രൊട്ടക്ഷൻ കാബിനറ്റ് സെക്രട്ടറി ആൽഫ്രഡ് മുതുവ പറഞ്ഞു

. സർക്കാർ സ്ഥാപനങ്ങളുമായും ലൈസൻസുള്ള റിക്രൂട്ട്‌മെൻ്റ് ഏജൻസികളുമായും സഹകരിച്ച് കഴിയുന്നത്ര കെനിയക്കാരിൽ റിക്രൂട്മെന്റ് സന്ദേശം എത്തിക്കാൻ ശ്രമിക്കുമെന്ന് മുതുവ പറഞ്ഞു. കെനിയക്കാർക്ക് മൊത്തം 8,000 ജോലികൾ ലഭ്യമാണെന്നും റിക്രൂട്ട്‌മെൻ്റിൻ്റെ ആദ്യ ഘട്ടത്തിൽ 3,247 കെനിയക്കാരെ വിവിധ ജോലികളിലേക്ക് തിരഞ്ഞെടുത്തിട്ടുണ്ടെന്നും മുതുവ വ്യക്തമാക്കി. ബാക്കിയുള്ള ഏകദേശം 5000 ജോലികളിലേക്കാണ് ഇപ്പോൾ റിക്രൂട്ട്‌മെൻ്റ് ഡ്രൈവ് നടത്തുന്നത്.

"ഖത്തർ തൊഴിൽ സംരംഭത്തിൻ്റെ ആദ്യ ഘട്ടത്തിൽ, നമുക്ക് ലഭ്യമായ 8,000 ഒഴിവുകളിൽ 3,247 ഒഴിവുകളിലേക്ക്‌ കെനിയക്കാരെ തിരഞ്ഞെടുത്തു.അവരിൽ ഏകദേശം 1,500 പേർക്ക് ഇതിനകം ഓഫർ ലെറ്ററുകൾ ലഭിച്ചുവെന്നും അവരുടെ യാത്രാ ഡോക്യുമെൻ്റേഷൻ അന്തിമ ഘട്ടത്തിലാണെന്നും അറിയിക്കുന്നതിൽ എനിക്ക് സന്തോഷമുണ്ട്. തിരഞ്ഞെടുത്ത എല്ലാ ഉദ്യോഗാർത്ഥികളും വരും ആഴ്ചകളിൽ ഖത്തറിലേക്ക് പോകുമെന്ന് ഞങ്ങൾ പ്രതീക്ഷിക്കുന്നു. ഈ തൊഴിലവസരങ്ങൾ വാഗ്ദാനം ചെയ്ത ഖത്തർ കമ്പനി ശേഷിക്കുന്ന 5,000 സ്ലോട്ടുകളിലേക്കുള്ള റിക്രൂട്ട്‌മെൻ്റ് പൂർത്തിയാക്കാൻ ഉടൻ തിരിച്ചെത്തും," മുതുവ പറഞ്ഞു.

"ആഴ്ചതോറും 3,000 അല്ലെങ്കിൽ 5,000 കെനിയക്കാരെ വിദേശത്തേക്ക് അയയ്ക്കാൻ ഞങ്ങൾ ആഗ്രഹിക്കുന്നു. ഇതുവഴി അവർക്ക് നാട്ടിലേക്ക് പണം അയയ്‌ക്കാനും രാജ്യത്തിൻ്റെ പുരോഗതിക്ക് സംഭാവന നൽകാനും കഴിയും," പ്രസിഡൻ്റ് വില്യം റൂട്ടോ പറഞ്ഞു.