ദോഹ: ലോകം ആകാംക്ഷയോടെയും ഭീതിയോടെയും കാത്തിരുന്ന ഇറാനെതിരെയുള്ള ഇസ്രയേലിന്റെ തിരിച്ചടി ശനിയാഴ്ച പുലർച്ചെ സംഭവിച്ചു. ടെഹ്‌റാൻ, ഖുസെസ്ഥാൻ, ഇലാം പ്രവിശ്യകളിലെ സൈനിക കേന്ദ്രങ്ങളിൽ ഇസ്രായേൽ ആക്രമണം നടത്തിയതായി ഇറാൻ എയർ ഡിഫൻസ് അറിയിച്ചു.

ശനിയാഴ്ച പ്രാദേശിക സമയം പുലർച്ചെ 2.30 ന് ശേഷം തലസ്ഥാനമായ ടെഹ്‌റാനിലും അടുത്തുള്ള കരാജിലും കിഴക്കൻ നഗരമായ മഷാദിലും കുറഞ്ഞത് ഏഴ് സ്‌ഫോടനങ്ങളെങ്കിലും റിപ്പോർട്ട് ചെയ്യപ്പെട്ടിട്ടുണ്ട്.

ഇറാനെതിരായ വ്യോമാക്രമണം പൂർത്തിയായെന്നും മിസൈൽ നിർമാണ കേന്ദ്രങ്ങൾ ഉൾപ്പെടെയുള്ള സൈനിക കേന്ദ്രങ്ങൾ ലക്ഷ്യമിട്ടെന്നും ഇസ്രായേൽ സൈന്യം പറഞ്ഞു.

അതേസമയം, ഇസ്രായേൽ ആക്രമണങ്ങൾ പരിമിതമായിരുന്നെന്നും അവർ വാഗ്ദാനം ചെയ്തതുപോലെ ഗുരുതരമായിരുന്നില്ലെന്നും റിപോർട്ടുകൾ പറയുന്നു. രാത്രി ആകാശത്ത് സ്ഫോടനങ്ങളോടെ ഇസ്രായേൽ മിസൈലുകളെ ഇറാനിയൻ വ്യോമ പ്രതിരോധം വീഴ്ത്തുന്നതിന്റെ വീഡിയോകളും സോഷ്യൽ മീഡിയയിൽ പ്രചരിച്ചു.

ഇറാനെതിരായ തിരിച്ചടികൾ ആരംഭിക്കുന്നതിലെ കാലതാമസവും വൻ അവകാശവാദങ്ങൾക്ക് ശേഷം ഇറാനെതിരെ ചെറിയ തോതിലുള്ള ആക്രമണവും കാണിക്കുന്നത് ഇറാനെതിരായ ഭീഷണികൾ പരക്കെ പ്രതീക്ഷിച്ചതുപോലെ നടപ്പിലാക്കാൻ ഇസ്രായേലിന് കഴിയുന്നില്ല എന്നാണ്.

ഇസ്രായേൽ ആക്രമണത്തിൽ നിന്ന് വ്യാപകമായ നാശനഷ്ടമുണ്ടായതായി റിപ്പോർട്ടുകളൊന്നുമില്ല, ടെഹ്‌റാൻ വിമാനത്താവളത്തിൽ വിമാന പ്രവർത്തനങ്ങൾ പുനരാരംഭിച്ചു.

ഇന്നത്തെ ആക്രമണത്തിന് ഇറാൻ തിരിച്ചടിക്കാൻ ഇസ്രായേൽ ആഗ്രഹിക്കുന്നില്ല എന്നത് വ്യക്തമാണ്. എന്നാൽ ഇറാൻ തിരിച്ചടിക്കുമോ എന്ന് വ്യക്തമല്ല.

തങ്ങളുടെ വ്യോമ പ്രതിരോധ സംവിധാനങ്ങൾ ശക്തമാണെന്ന് ഇറാൻ ഇപ്പോൾ തെളിയിച്ചിരിക്കുകയാണ്