ദോഹ: നവംബർ-ഡിസംബർ മാസങ്ങളിൽ ദോഹയിൽ നടക്കുന്ന ലോക കപ്പിന് സുരക്ഷ നൽകാൻ അമേരിക്കൻ പോലീസും.

അമേരിക്കയുടെ ആഭ്യന്തര വകുപ്പായ ഹോംലാൻഡ് സെക്യൂരിറ്റിയിലെയും രഹസ്യാന്വേഷണ വിഭാഗങ്ങളിലെയും പോലീസ് ഉദ്യോഗസ്ഥർ ഖത്തറിലുണ്ടായിരിക്കുമെന്നു ഹോംലാൻഡ് സെക്യൂരിറ്റിയിലെ ഒരു ഉന്നത ഉദ്യോഗസ്ഥൻ പറഞ്ഞു.

മെഗാ സ്പോർട്സ് ടൂർണമെന്റുകൾ കൈകാര്യം ചെയ്യുന്നതിൽ അമേരിക്കക്കുള്ള പരിചയം കണക്കിലെടുത്താണ് അമേരിക്കൻ പോലീസ് ഉദ്യോഗസ്ഥരെ ദോഹയിൽ വിന്യസിക്കുന്നത്.

"സുരക്ഷിതമായ ഒരു ലോക കപ്പ് ഉറപ്പുവരുത്താൻ ഖത്തറുമായി ഞങ്ങൾ സഹകരിക്കും. ലോക കപ്പിന് ഞങ്ങൾ സുരക്ഷ നൽകും. ഇത് പല തരത്തിലായിരിക്കും," ഹോംലാൻഡ് സെക്യൂരിറ്റിയിലെ റോബ് സിൽവേർസ് പറഞ്ഞു.

സെക്യൂരിറ്റി ആവശ്യങ്ങൾ പഠിക്കാൻ ഈ ആഴ്ച ഖത്തറിലെ എത്തുമെന്നും അദ്ദേഹം പറഞ്ഞു.

"ഖത്തറിൽ നിന്നും ഒരു ഉന്നതതല സംഘം അമേരിക്ക സന്ദർശിക്കും. എയർപോർട്ടിൽ ഞങ്ങൾ ഉപയോഗിക്കുന്ന സെക്യൂരിറ്റി സിസ്റ്റം അവർക്ക് പരിചയപ്പെടുത്തും. ലക്ഷക്കണക്കിന് ഫുട്ബാൾ ആരാധകർ ദോഹ സന്ദർശിക്കുന്ന പശ്ചാത്തലത്തിൽ ഞങ്ങളുടെ സുരക്ഷാ ക്രമീകരണങ്ങൾ അവർക്ക് പ്രയോജനപ്പെടും," അദ്ദേഹം പറഞ്ഞു.

അമേരിക്കൻ രഹസ്യ പോലിസും ഖത്തറിൽ ഉണ്ടായിരിക്കുമെന്നും സൈബർ സെക്യൂരിറ്റി നൽകുമെന്നും അമേരിക്കൻ ഉദ്യോഗസ്ഥർ അറിയിച്ചു.